Gabay sa Pagbasa ng Nobela

 

1. Ano ang ibig sabihin ng Maghuhurno? Bakit ito ang pamagat ng nobela?

Baker ang katumbas sa Inggles ng Maghuhurno. Puwede ring Hurnera.  Ibig sabihin, gumagawa ng cake sa pamamagitan ng pagluluto sa pugon o oven, isang kulob na lutuan kung saan ang init ay nakakulong at paikot-ikot.

 Naging inspirasyon ng may-akda ang tala sa kasaysayan ng Historiador na si Ambeth Ocampo tungkol sa Maghuhurno ng Kawit na siyang nagluto ng bibingka na inihanda sa pagdeklara ng kasarinlan ng Pilipinas sa Kawit, Cavite noong Hunyo 12, 1898. May talaan kung saan nakalista— Bibingkera ng Presidente —at ang halaga ng salapi na ibinayad sa paluluto.

 Sapagkat ang obra ay kathang-isip, minabuti ng may-akda na ang pangunahing tauhan na si Liz, ay maging apo sa tuhod (ika-apat na henerasyon) ng Hurnera ng Kawit. Hindi naitala sa kasaysayan ang ngalan niya.

 Ginamit na talinghaga ang paghuhurno sa pagbibigay kahulugan sa pagbuo ng sarili na hati o wasak (boken, fragmented) dahil sa mapait na danas.

2.      Ano ang paksa ng nobela?

Ang nobela ay tungkol sa pagsinta sa pagitan ng babae at lalaki na magsing-irog, pagmamahal sa bayan, at pag-ibig sa Dios. Tungkol din sa pagtataksil, pagsisisi, pagpapatawad, at pagpapatuloy sa buhay.

 3.      Paano tinalakay ang maselan na usapan ng patataksil?

Inungkat ang pagtataksil sa Dios na naganap sa Eden nang ang mga unang nilalang ay sumuway sa utos, nang magtaksil si Aguinaldo sa prinsipyo ng Himagsikan, ang diktadura noong dekada ’70, at pagtataksil ng mga pangunahing tauhan sa kani-kaniyang kabiyak at katipan.

 4.      Bakit itinuring na mapangahas ang nobela?

Mapangahas ang nobela sa pagtalakay ng bawal na pag-ibig at pag-ibig na transaksyonal o may usaping salapi, pagnanasa, seksuwalidad, usaping LGBTQ+, mga usaping politikal, feministang ideolohiya, at doktrina na hindi laging ayon sa organisadong relihiyon.

5.      Paanong ang nobelang ito ay angkop basahin ng mga mag-aaral ng Literatura sa senior high school?

Ang mga kabataan  ay matalino, mulat, mapanuri, at siyempre, mapusok sa  pagtuklas ng sariling mga landas at pamamaraan sa buhay. Makikita nila ang kanilang mga sarili sa panahon ng kabataan ng mga tauhan na sila Liz at Enzo, hanggang sa sila ay tumanda na; paano ituwid ang mga kamalian, magpatawad, at patawarin ang sarili. 

 6.      Bakit recommended reading din para sa mga estudyante ng Bachelor in Secondary Education, major in Filipino?

Higit na mahahasa ang matalas na pakiramdam at kakayahang magsuri ng at magbigay puna sa mga akda tungo sa higit pang ikauunlad ng Panitikang Filipino at malikhaing pagsulat.